Van roes en amarant

Pirow Bekker se sewende digbundel, Van roes en amarant, is stewig veranker in die werklikheid en daar word byna sonder uitsondering verwys na 'n herkenbare Suid-Afrikaanse wêreld: plekke met name soos Doornhoek, Kuruman en Bad-se-loop; plante soos die kameeldoring, kiepersol en geelhout, diere soos die gemsbok, ratel en namakwaduif. Dikwels is daar in die gedigte ook sprake van dinge wat baie gewoon is, soos septiese tenks en roltrappe.