Julie 2026 Romanza Boekpak met Stoom

*Helma van Rooibos - Jaco Versfeld.
Helma bevind haar in Frankryk ná 'n mislukte verlowing. Teen haar beterwete raak sy betrokke by die selfversekerde Thomas Uys, al is hy vaag oor sy eie lewe.
Tydens 'n krisis waag Helma dit om op Thomas te steun, net om uit te vind dat alles wat hy voorgegee het, 'n leuen was. Hulle kan mekaar egter nie vermy nie, en haar gevoelens versterk net terwyl sy die ware Thomas leer ken.
Voel Thomas dieselfde, of gebruik hy haar net?

*Hoe ver is eendag? - Dina Botha.
Terwyl Belladonna se bestuurder wittebrood hou, neem Enya Joubert as bestuurder van die afspraaktoepassing waar. Enya Joubert is gewoond daaraan om agter die skerms te werk, en kommunikasie met regte mense is nie haar sterk punt nie.
Nou dreig Keenan Luyt die agentskap met regsaksie nadat sy suster wreed bedrieg is deur 'n man wat sy op Belladonna ontmoet het. Keenan gee Enya een kans om die situasie reg te stel en sy suster uit haar diep depressie te red.
Gaan sy Belladonna én haar eie hart kan beskerm?

*In `n oomblik - Elsa Winckler.
Kirsten du Bois is oortuig sy gaan bevorder word omdat sy hard werk. Haar baas reken egter sy is nie spontaan en warm genoeg met die kliënte nie, en iemand anders kry die pos. Om te bewys sy kan spontaan wees, aanvaar sy haar susters se uitdaging om aan 'n wildvreemde man se hand te vat.
Marnus Grobbelaar, erfgenaam van 'n hotelgroep, het 'n verloofde nodig voordat sy pa hom sal toelaat om die besigheid oor te neem.
Marnus oortuig Kirsten om te maak of hulle verloof is, maar die lyn tussen kamma en rêrig raak vinnig dof.

* Vrypostige vreemdeling - Elize Davies.
Melanie is bitter verontwaardig toe 'n aantreklike vreemdeling by haar ouerhuis opdaag en haar met 'n soen groet. Ruan Retief beweer hulle het saam op Vissershoek vakansie gehou.
Melanie vind uit haar identiese, getroude tweelingsuster het voorgegee sy is Melanie en met Ruan geflankeer terwyl sy op vakansie was. Melanie moet noodgedwonge saamspeel om haar suster se huwelik te beskerm.
Maar wat sê sy vir haar verloofde? En hoe moet sy die ongekende gevoelens wat Ruan in haar wakker maak, hanteer?

*`n Doodgewone ou - Marilé Cloete.
Adele Bruwer is tevrede met haar lewe as enkellopende en haar werk as spysenier saam met haar tweelingbroer, Anton. Die verwydering tussen hulle en hul ouers het sy doelgerig diep in haar onderbewussyn weggebêre.
Toe Anton vir Fiona liefkry, ontmoet Adele Fiona se broer, Franz. Die vier word drafmaats, maar Adele en Franz sit gedurig vas. Franz verstaan nie Adele se vervreemding van haar ouers nie.
Kan Adele haar wrokkigheid oorkom en haar hart oopmaak vir 'n ernstige verhouding?